從特侖蘇事件看蒙牛之一

入正題之前，問吓大家三聚青胺同OMP兩者有咩關係?相信大家至少可以聯想到：
一)兩隻嘢都係化學物；
二)兩隻嘢都係添加落牛奶產品度；
三)兩隻嘢都可能影響嬰兒身體；(OMP後被證實為未經國家質檢局核準使用物質)
四)兩單嘢都同蒙牛(02319)有關；
問題嚟嘞，前三點大家可能覺得有啲無奈，但當諗到第四點，大家不禁會問：蒙牛究竟發生咗咩事?
一間曾經喺品牌推廣上贏盡掌聲既企業，點解近期頻頻出事?
記得內地爆出三聚青胺事件之後，雖然蒙牛都受到牽連，股價一瀉如注，當時筆者反而認為事件對蒙牛影響有限，正如蒙牛向投資者發出公告所講，事件會係蒙牛徹底改進，提振競爭力既時機。
於是乎蒙牛一方面回收問題產品，另又決意積極監測，確保出廠產品不含三聚青胺，又承諾檢討質管系統，後期處理似乎幾全面，如果當時能夠及時喺中期業績公告入面交代事件當然更完美。
有句說話，筆者經常銘記於心，就係「為善不終」，筆者唔及解籤佬，好粗淺既解做「做好事就要做得徹底啲，否則就會前功盡廢」。既然蒙牛捉到「鹿」，係三鹿奶粉事件之後，點解唔識得「脫角」?點解當時蒙牛竟然無諗到要測試埋其他添加喺牛奶產品內既化學物?
有時，一些證券行報告的取態真的只應「睇過就算」。翻查近日新聞同分析報告，有證券行就蒙牛事件發表報告，報告指OMP事件對蒙牛品牌形象負面影響大過實際利潤影響，因蒙牛數據顯示“特侖蘇OMP”奶佔其2007年總收入的比率僅為2%。
為了對得住成報讀者，筆者於是認真地翻查了蒙牛去年九月份的中期報告，以求證上述結論之可信性，究竟筆者搵到咩得意嘢，篇幅所限，飲緊蒙牛特侖蘇或者買咗或想買蒙牛股票既讀者，請繼續關注。
韓風
2009年2月17日
(本文同時刊載於2009年2月16日出版之成報「金融風報」欄目。成報為東方航空讀物 ,全港報攤有售。修訂版分別轉載於香港投資者關係專業人員協會官方網站http://www.irpa.com.hk/以及香港名牌網http://www.hk-brands.com/名牌資料室欄目。)