落車唔好睇番轉頭

昨日叫人落車，股市正處於所謂消息真空期(除咗北韓核試之外)，不過「地區性」小動作，對處於亢奮狀態的亞洲股市而言，影響似乎有限，除韓國指數明顯下跌外，其他地區依然我行我素。
熱錢仍未散走，港股的主旋律係炒資產折讓。地產股繼續狂飈，仍然相信「市場是精明的」，突然間兩日炒起晒地產股，絕對有根有據，講明啲地產股升番只係時間問題，即使無大摩報告，當市場有啲聰明人肯定全球性通貨膨脹即將來臨，啲現金如何自處?
買商品包括磚頭似乎係唯一出路，君不見昨日恒指並無升幅，但地產股就一枝獨秀，原因除咗地產股大落後之外，最大原因就係有人已經判咗美國經濟死症－大量印鈔而唔出現通脹，歷史所少見也!
有人問，但係美國政府連埋財金當局都話，唔會出現惡性通脹，消息如何判斷?個人偏見係－政府說話你都信既?唔通政府話俾你聽：係呀，依家會有通脹，而且政府無辦法去解救，你哋買定啲樓股同商品股咩。
此時此刻，大家要尋找的，絕對只有應升而未升的優質地產相關股份，按圖索驥的包括遠洋地產(3377)、瑞房(272)，仲未夠?不妨留意樓股以外的另一選擇－燃氣股，個人鍾情中國燃氣(384)、華潤燃氣(1193)，原因係商品股如油等價格雖然波動，但仍有勢升，油與燃氣某個程度有聯動關係，燃氣股有咁多投資亮點，大家可以不妨跟進跟進。當然，落咗車的股票就唔好睇番轉頭啦。

又到落車時

雖個人持有長線股如匯豐，但一般推介皆以三個月為計算，從不與股票談戀愛，有時投資必須要理性無情，拋卻諸如「邊度跌低就邊度起番身」等等的情緒，即使某些股(或人)搞到您輸干輸淨，也不要留戀，因為留得青山在，世事係留低往往越輸越多。
講完肺腑之言，今日正題係「又到落車時」，由2月25日推介至今，剛好三個月，正是結數之時。邊啲股票要落車?
成渝高速(107)，2月推介至今上升77.6%，即係每萬元獲利7千幾，派息穩定，股市不明朗之際，繼續持有。
天大管材(839)，近日受惠油價回升，推介日計升91.9%，油價始終波動大，不如埋單計數，節衣縮食夠成個月使費，落車。
3月份推咗四隻醫藥股，分別上升32%至57%不等，長線仍受惠國策，繼續持有，如嫌過多醫藥股，建議保留山東威高(8199)及廣州製藥(847)。點解?原因講出嚟莫見笑，因為個人認為醫療設備出事機會較低，總唔會出現類似藥物大規模回收事故，現時投資雖然短線，但都係傾向穩穩陣陣。廣藥部份業務為藥品分銷，防守性較高，但上升亦較慢。
飛達帽業(1100)、中國稀土(769)玩票之作，概念不強，個人傾向落車。阜豐集團(546)潛力不俗，應有餘力再上，但投資應少存僥倖心理，個人建議落車。
落咗車仲想炒?得，買番幾千蚊三、四線股擺喺度，話唔定有啲意外驚喜呢。有無好介紹?第日再談。

派息代繳稅小股東難搞

相信近日大家都可能收到不同國內企業的通知，就公司派息代扣代繳企業股東企業所得稅作出說明。
根據二零零八年一月一日生效的《中華人民共和國企業所得稅法》及《中華人民共和國企業所得稅法實施條例》（統稱「稅法」），凡中國境內企業向非居民企業股東派發股息時，需為該股東代扣代繳10%的企業所得稅。至於境外股東，即係包括香港持有內企股票的股東，稅法亦有相關規定，內企向境外企業股東派息時亦須預扣10%的企業所得稅。
稅法對於境外非居民企業股東之定義，係包括咗「香港中央結算（代理人）有限公司、其他代理人、受託人或其他團體及組織」，
即係如果股東名冊只睇到你代理人公司既名，咁就要依法交企業稅嘞。
問題嚟嘞，香港其實好多投資者包括基金，股票都放在受託人，若非在引用法律要求進行披露，在股份登記處顯示的名字許多並非個人甚至並非基金名字，那平白無故地，個人投資者也可能被無辜額外徵稅。
對於在下這些「小散」(國內對散戶之稱，與香港的「蛋散」意思不同)而言，若為了數十元股息免被「水瓜打狗」，唔見幾皮，應該點做呢?
不少公告指「公司無義務確認股東身份」，總之見到有公司名就代交稅」，廣大投資者如需更改持有人身份「請向代理人或信託機構查詢相關手續。」當然，手續係絕對繁複的。有公告又說大家「如有任何疑問應諮詢專業稅務師。」為咗一百幾十，唯有辛苦大家啦，其實相比機構投資者計YIELD時要自動扣10%已經叫少有哋有啲優勢啦。

創維數碼可加碼

聯儲局同蓋特納語氣有別，認為今年經濟倒退最高達2%，失業率越唻越接近雙位數，美股又表演單日轉向。
悲觀氣氛傳到亞洲，上證低開，最高見2657，其後掉頭低試2600心理關口。恒生指數中午收報17316點，跌159點，全日則收[]；國指收[]點。
創維數碼宣佈四月份電視機銷售量，相比2008年4月，本集團中國彩電事業部於2009年4月的平板電視機(大部份為液晶電視機)銷售量激增257%。產品結構得以不斷改善是由於添置或更換液晶電視機的需求正轉移至內陸城市及鄉鎮，液晶電視機持續普及。
另一方面，CRT 電視機的需求持續迅速萎縮。
中國政府在2009年5月14日公佈第5批全國「家電下鄉」中標名單，創維有30款電視產品直通入選，當中有15款是液晶電視機，而電視機的零售最高限價由之前的人民幣2,000元提升至3,500元。
海外電視事業部的產品結構逐漸提升至價錢較高的液晶電視機，2009年4月的銷售量錄得比2008年4月達20%的升幅。但CRT電視機需求則持續迅速萎縮。
近期力捧創維之聯昌國際發表最新報告，重申買入評級，並將目標價由1.08港元提高到1.59港元，聯昌話創維基本因素改善，相信目前股價仍有上升空間，又認為如果家電下鄉規模及範圍擴大，創維就更加猪籠入水。不過創維3個月升咗成倍，要加碼則要忍手，等回到1.05左右，短期目標價1.25元。

市況爭持蒙能奇景

美股低收，港股今早走勢反覆，恒生指數中午收市報17471點，跌73點，成交433億元，全日則收[]；國指收[]點。深滬股市繼前日再創新高後，昨高開後好淡爭持。
三大煤炭股表現維持強勢，神華能源(1088)、中煤能源(1898)及兗州煤業(1171)繼續有升幅，煤價受油價攀升影響，即時作出反應。
講到煤炭股，又不得不提蒙古能源(276)。蒙能於中期業績時透露，集團於去年五月(至今剛好一年)，收購位於蒙古西部額外約264,000公頃涉及煤炭、黑色金屬及有色金屬資源專營權地區之業權。收購完成後，蒙古能源已收購之蒙古西部之煤炭、黑色金屬及有色金屬資源專營權地區總面積達至約330,000公頃。
同時，蒙能已訂立完成收購新疆凱禹源25%權益，使蒙能間接持有
凱禹源與中國兩家地質局就中國新疆其中約20億噸煤炭資源20%權益。
蒙能已著手進行連接礦區至中國新疆邊境通道塔克什肯（Yarant）之公路（「胡碩圖公路」）之相關工程，至舊年底公路已建成其中243公里，希望於今年將蒙古西部胡碩圖發展首個以焦煤為主、年產量為3百萬噸之煤炭開採業務，並設立目標於二零一二年前將規模提升年產量8百萬噸，據顧問意見蒙能應集中向中國新疆銷售焦煤。
雖然上半年蒙能錄得虧損，但多為能源及相關資源項目之會計虧損。昨日蒙能配合大手成交大升，成交額超過十億，市況小回之中有此奇景?唔知有咩啟示?

居安思危防兩面受敵

蓋特納出口術，話經濟基調良好，市場憧憬球環經濟復甦，美股如火牛橫衝直撞，油價升更是火上加油。區內股市隨歐美全面向上。發改委肯定今年經濟能「保八」，深滬股市齊再創新高，上證高見2688創逾9個月新高。
港股承接美股升勢高開，如飲咗紅牛，插翼而升。中午衝破17,500水平，全日則收[]；國指收[]點。昨透露買入些少匯豐(5)認沽證作對沖，若匯豐升穿70元，港股穿18,000，可能要同時平掉沽證同匯豐埋單計數，但穩穩陣陣買個心安。
筆者推介多日的勝獅貨櫃(716)繼續向上，昨日高開後，股價在0.84-0.85爭持。一般人贏就縮輸就谷，股票最好就係趁勢，市場氣氛咁好，唔見一蚊千祈唔好落車。
匯豐自配股以來，股價保持升勢，但理性啲諗，除咗業績可能倒退之外，每股盈利由中期開始，應該只係原來股數七成左右，加埋經濟基本因素已不如二零零七年般樂觀，匯豐能否繼續脫離實際上升則實在考起。當然除非匯豐短期內有併購則另作別論，始終股市都係炒未來。
股市升、油價升，中石油(857)、中石化(386)、中海油(883)即時彈起。怪現象是油價升，航運、航空股亦不受影響，錄得升幅。
黃金避險作用減弱，金股如紫金(2899)、招金(1818)都要抖抖，但熱錢流竄，低息環境會維持幾耐?如果金價繼續跌，未來要多留意入市機會，都係嗰句，居安思危，美國已經有學者話通脹可能係美國未來最大問題，一旦加息，股市不難兩面受敵。

無可奈何花落去

勝獅貨櫃(716)自5月1日以來股價明顯轉強，上周二推介時已有勢突破三個月高位，上周五收0.77元，昨日上試0.8元。無論PE或PB仍然極為吸引。反觀上周提及的福田實業(420)沖完一輪，昨日開始出現疲態，股價「無可奈何花落去」。
說起無奈，也可一說股市大勢，縱然外圍股市回吐，港股仍然樂於玩過山車。事實上，經常提及的基本因素並無明顯改善，依家大家只係玩概念，基建、刺激內需過後，接力的是股市見底，跟著是美國壓力測試結果未如預期差，好消息不多卻掩蓋了許多壞消息，日本經濟數據惡化無人提、香港首季GDP急跌7.8%更是港聞版關心多啲。
反而台灣加權指數則繼續向上炒，難道真的可以靠中國一手撐起半邊天?海西區概念要真正落實，其實需要長時間，珠三角規劃出台不足一年，海西區概念和珠三角明顯重疊，到時會如何協調資源運用?不過股市就係咁，見到賈慶林同國民黨副主席一握手，開放大陸資金投資台灣好似已經亳無阻礙，實情係具體辦法尚未出台。CEPA出台咁多年，仍要逐步加入補充協議，可想而知要全面形成更緊密關係，係要長時間合作同互信，同埋穩定的兩地關係。
港股昨早最多跌450點至16300。但全日則收[]；國指收[]點。居安思危，雖持有匯豐，筆者上周亦買入些少認沽證作對沖，匯豐跌，認沽證相對上升，叫做打個和，如匯豐跌至56-57元，或者港股回到15,000-15,300點則平掉認沽證。