IR天與地：叻人唔做PowerPoint?

做咗成十年PowerPoint，深入腦海、揮之不去。早前睇咗本書，叫Real Leaders Don’t Do PowerPoint(姑譯做「叻人唔做PowerPoint」)，未睇前心情複雜，認定作者取名出位但求谷銷量，情況有啲似國內賣書，總是什麼「驚人內幕」、「改變一生的讀物」云云。 心裡嘀咕著，我們的特首參選人梁振英不也憑出席論壇show幾頁slides K.O.咗唐唐，搞到踩地雷後的唐唐尷尷尬尬，可愛地辯稱「唔知要做」? 當然細閱之下，書內所講的果然不是什麼重要發現，而是公開演講如何傳遞訊息，例如演講重點最好是三個，然後是適當場合講適當說話，拜山唔好講爛gag。結案陳詞是PowerPoint好重要，但內容angle更重要。Well，果然無估錯，當溫故而知新。 話說回頭，依家做business plan或公開present，PowerPoint已經係不可或缺，要幾長有幾長、要幾fancy有機fancy(普通話「花俏」較傳神)，有時文字甚至多到不知重點為何。 面對投資者，代表上市公司的負責人就需要做足功課。PowerPoint要做到實華兼備，內容有適當的鋪排，起承轉合，先以概述作始、繼以詳細解說、圖文並茂、層層推進，最終以重點作結。 PowerPoint為Presenter服務，「非以役人、乃役於人」，至於Presentation成敗與否，則關鍵在於講者駕馭內容的能力以及控制節奏之技巧，只靠PowerPoint並不足夠。投資者是否買新上市公司股票，很大程度取決於對公司的信任。除了檢視其投資故事、理解其營運模式之外，管理層說話的真確性和其敍事能力皆有所影響。 因此有了事前講演的排練、答問技巧培訓。手勢、眼神、身體語言，還有對演講內容的熟悉程度、預見投資者提問並且預備最為充份同時兼顧客觀持平、而具有正能量的答案。 叻人唔做PowerPoint?未必。但真正的叻人，要做的是「人『劍』合一」，千萬不要被PowerPoint牽著您走。