財爺派糖市民迷茫

依慣例，星期五本打算輕鬆一下。但係甘於平凡、無打算更上層樓的曾財爺偏偏要推出一份比佢本人更平凡的「平凡」(但不平衡)預算。，被「譽」為「大包裝，派粒糖」，筆者想加一句「市民迷茫」。
呢份預算案係一份無主題、堆砌成事既預算案，樣樣野都到喉唔到肺。經過近半年諮詢，晚晚喺電視叫人俾意見，製造出「你俾意見，我嚟實現」的海市蜃樓，跟住求其攞啲庫存零頭創造6萬個職位嚟自拆招牌，又俾錢人優化生活(不明白增加幾千萬資助安老宿位、提升婦女個人能力點解叫做優化生活，呢啲係基本生活同發展權利嚟噃!)，退稅少係因為有赤字，所以你死你事，喂!依家係政府救市，唔係公司上市。
於是低下階層認為預算案只幫到有錢人(有啲人概念中係只要交稅就係有錢人)，學者又話水份多，中產就話「無幫拖」，啲老細級就費事同你唱歌。
有媒體引政府消息人士話政府要留力，因為分分鐘經濟似大摩所講復甦要三到五年。唔知身家縮水、工作朝不保夕既香港人等唔等到咁耐，果如此，政府可唔可以俾一個三到五年既施政規劃出嚟呢?君不見祖國政府都有五年計劃?
前日記者會上，曾司長仲要叫小白臉(白領)用積蓄嚟幫自己，我提議白領或者中產人士要幫自己，不如選擇移民去新加坡或者返上海、北京建設祖國，留喺度真係眼冤。最後引用陸遊情詩「東風惡，歡情薄，一懷愁緒，幾年離索，錯! 錯! 錯!」嚟應吓景。希望港府第日唔好悔不當初。祝周末愉快！
韓風
2009年2月27日
(本文同時刊載於2009年2月27日出版之成報「金融風報」欄目。成報為東方航空讀物 ,全港報攤有售。修訂版分別轉載於香港投資者關係專業人員協會官方網站http://www.irpa.com.hk/以及香港名牌網http://www.hk-brands.com/名牌資料室欄目。)