昨日談到S籌公司借貸過度將間公司拱手讓人，投資者當然欲哭無淚。至於另一間公司則更離譜，核數公司指該生化公司的會計帳目不尋常，當財務顧問要求查核時卻不得要領，公司主席還反對公司發出公告解釋，講明要獨立董事對公告事件所造成的成本及費用負全責。
事件詳情在於核數師羅兵咸永道於今年三月做全年核數時，發現其中5.9億人民幣銀行結餘未能取得銀行確認，公司主席孫氏解釋啲錢攞咗去買粟米，但核數師覺得解釋牽強，另外一條約3.4億人仔的應收債項是否存在亦是未知之數。據該公司公告，一名獨董己去信主席要求對事情作解釋，同時關注財顧畢馬威未能取得公司帳目記錄。
據畢馬威憶述，當畢馬威職員去到該公司蘇州總部時，該公司職員聲稱帳目去咗瀋陽進行核數，其後開電腦查數時又突然間出現斷電，職員話因為公司翻新所以供電有問題，但在同一間房另一部電腦卻仍然正常運作。
今年4月，當畢馬威去到公司另一個地方核數時，運送會計紀錄的貨車居然在司機用膳時被偷!
睇下睇下，筆者仲以為睇緊周星馳既「國產凌凌漆」，成間公司就好似一個戲棚，可能全公司所有人都係臨記，所有帳目只係「備考」－僅供參考絕不能當真，你要睇真係就正如主席所言後果自負，好彩畢馬威啲職員仲有命番出唻，未遭「金槍人」毒手。
祝周末愉快!
韓風
2009年5月8日
(本文同時刊載於2009年5月8日出版之成報「金融風報」欄目。成報為東方航空讀物 ,全港報攤有售。修訂版分別轉載於香港投資者關係專業人員協會官方網站http://www.irpa.com.hk/以及香港名牌網http://www.hk-brands.com/名牌資料室欄目
